Līga Logina

Līga Logina dzymuse 1976. godā 27. jūlijā Ivanovkā, Škilbanu pogastā. Juos tāta beja Juoņs Logins, mamma - Anna Zelča. Lyluokū daļu biernības Līga nūdzeivova Ančipovā pi sovas babas Nadzeždas Šakinas. Līga ir pabeiguse Upītes pamatškolu. Tuoluok aizguoja muocietīs iz Jaungulbeni par lauku muoju saimenīci, bet studijas napabeidza – apsaprecejuos. Līgas i juos veira Andreja saimie izaudzynuoti treis bārni. Līgai jou ir ari divi mozbārni.

Līgai cīši pateik floristikas dorbi. Vīna nu vysvairuok taisietajuom lītuom ir bieru vainagi pa “vacejai mūdei”, kod iztaisa pamatni i tod pīpilda vydu ai zīdu puškīm. Dorbs prosa gon īmaņas, gon pacītību, gon meistarību, lai vainags byutu stingrs i vusas sastāvdaļas cīši turātūs kūpā. Lai iztaisietu tuodu vainagu vāga kuodas četras stundes pacītīga dorba. Vusu Līga īzamuocejuse pašmuocības ceļā. 

Līgas mammai beja tuods pietnīces gors, jei pazaviere kuo vīns vainaigs taisiets, ūtrs, i ar Līgas paleidzību, pamieginova vainagu taisiet pašas. Līga pīmin, kuo tyka sataisiets jūs pyrmīs bieru vainags. Kod 20. gs. 90. godūs nūmyra Ančipovas dzeds Staņislavs tys bejs tuods laiks, kod vainagi beja duorgi, bet vajadzība beja lyla i kūpā ar mammu ķieruos pi dorba. Pyrmīs vainags nabej ideals, bet piec tam sekova vieļ vairuokas reizes, kod vainagi beja juotaisa i tys veicynova īzamuociet taisiet lobus bieru vainagus pašuom. Tādinejīs Līgas lylīs paleigs ir juos jaunuokuo meita Sindija, kura ir izpaleidzīga, cīši pacītīga i nazabeist nu dažuodīm sarežgītīm i laikītilpīgīm dorbīm.

Līgas Loginas veiduotīs bieru vainags

Ančipovas baba Nadzežda beja lyla saimenīca i rūkdarbnīce. Daudzas lītas Līgu ir īmuocejuse tīši baba, jū tod, kod baba adeja, gribejuos tuopat adiet ari Līgai. Līga ir adejuse gon džemperus, džemperkleitas, pierstenīkus I vieļ tādin ik pa laikam tīk izadātas zečītes mozuo bārna pyuriņam. Mīlestību iz rūkdorbīm vusuvaira ir īmontovuse Līgas jaunuokuo meita Sindija. Nu babas Līga īzamuoceja ari gatavuot dažuodus gales iedīnus. Tod, kod Līgas bārni beja mozi sovā saimnīcībā Upītie saime tureja cyukas, leidz ar tū ir īzamuocejuse piec cyukas kaušonas sadaliet cyukas gali i gotovuot dažuodus iedīnus, lītderīgi izmontojūt vusu cyukas gali (ruletes, asins dasas, suolietū speki utml.).

Torti pyrmū reizi pamieginova cept kūpā ai Ančipovas dzedu Šakinu Staņislavu, kod baba beja tykuse slimnīcā. Līga dzedu pīmyn, kuo jauku cylvaku, kurš jū stipri žālova i tuopiec kūpā darātī dorbi ir cīši palykuši atmiņā. Dzeds Līgai atļāvs dariet dažuodas lītas, kū baba eisti nav ļāvuse, tuopiec pyrmuo kūpīgi captuo biskvita torte ir labi palykuse meituškas pīmiņā. Nuokamū torti cepa tod, kod bārni suoka muocietīs Upītes školā. Tuo īzapatyka i sovuom saimes vajadzībuom tādin cap tortes dīzgon bīži.

Ilgu laiku Līga nūstruodova z/s “Sābri”, tī īzamuoceja cept boltmaizi i soldskuobū maizi.

Līgai cīši pateik taisiet soldanūs iedīnus, cept capumus, speķa peiradziņus i bulkas. Cīši lylu prīku Līgai saguodoj, laiks kod sabrauc vusi bārni ai mozbārnīm i vusi kūpā cap piparkūkas. Cept piparkūkas pateik ari Līgas mozbārnīm - vacuokuos meitas Samantas bārnīm.

Roksts īvītuots 2023. goda martā